हेक्के गांवां मां हेक लाकड़िया टुकणे आल्ला रहता। ओ घणा गरीब हुत्ता। ओ रोज लाकड़िया टुकती कन्न ते वान्हूं बेचत्ती कन्न आपणा गुजारा चलाता। हेक डियो ओ लाकड़िया टुकणे कल्ले जंगला मां गेल्ला। लाकड़िया टुकते बेल्हे हेकदम ओच्चे हात्था मूं कुहाड़ी छुटती कन्न नद्दी मां ढेती पल्ली। ओ बणा कन्नू तल्ले उतरला। ओण्हे नद्दी मां आपणी कुहाड़ी सोहली। पर्र ओन्हूं आपणी कुहाड़ी नीं लाभली।
ओण्हे सोचले हिम्मा मन्नू भुख्खे रहणे पड़ी। ओ सोचती-सोचती कन्न राऊं लाग्गती गेल्ला। ओन्हूं रोत्ते डेखती कन्न नद्दी मां रहणे आल्ला पाणिया चा देवता बहारू आल्ला। ओण्हे ओ कन्नू पूछले, तूं कां रोवी बेहला। लाकड़िया टुकणे आल्ला बोड़ला, माय्यी कुहाड़ी नद्दी मां ढेती पल्ली। पाणिया चे देवते ने ओन्हूं कहले, तूं रों ना में हिम्मा दुध्धी कुहाड़ी सोहती आवें। ओण्हे नद्दी मां टुब्बी मारली। ओ हेक पीले रंगा ची सोहणी कुहाड़ी चत्ती कन्न बहारू आल्ला। ओ बोड़ला, हा सोन्ने ची कुहाड़ी दुध्धी छे। लाकड़िया टुकणे आल्ले ने केहले, हा माय्यी कुहाड़ी कोन्हीं। पाणिया चे देवते ने बलति टुब्बी मारली। हिम्मा ओ हेक बगे रंगा ची सोहणी कुहाड़ी चत्ती कन्न बहारू आल्ला। ओ बोड़ला, हा चान्दी ची कुहाड़ी दुध्धी छे। लाकड़िया टुकणे आल्ला बोड़ला, कोन्हीं , हा माय्यी कुहाड़ी कोन्हीं। पाणिया चे देवते ने नद्दी मां बलति टुब्बी मारली। हिम्मा ओ हेक लोहे ची कुहाड़ी चत्ती कन्न बहारू आल्ला। ओण्हे ओन्हूं कुहाड़ी डिखाणती कन्न पूछले, हा दुध्धी कुहाड़ी छे। लाकड़िया टुकणे आल्ला खोस्स हुत्ती गेल्ला। ओ बोड़ला, हा माय्यी कुहाड़ी छे। ओण्हे ओच्चा धनयवाद करला।
पाणिया चा देवता बोड़ला, में दुध्धी परिकसा गिहें पलता ला। ओण्हे ओच्ची ईमानदारी कन्नू खोस्स हुत्ती कन्न तिन्हीं कुहाड़िया ओन्हूं डिलिया जत्ती। लाकड़िया टुकणे आल्ला तिन्हीं कुहाड़िया चत्ती कन्न आपणे घरे चाहला आल्ला।
शिक्षा- ईमानदारी चा फल मिठ्ठा रिहें वें।
